Ray唔少友好昨日WhatsApp相告，話CK重出江湖，邊個CK？原來係《人在中環》專欄位CK，標誌係以前中環海旁的舊天星碼頭鐘樓，佢寫辦公室政治，暢談職場百態，好鬼到肉，粉絲甚多，不過約兩年前CK因事忙擱筆，專欄暫停，令好多人若有所失，如今回歸再執起筆桿，令人期待，Ray當然亦係其中一分子。
Ray早前有幸跟隨am730編輯與CK同枱飯聚，先祝佢繼續寫多D好文章，等餓咗佢一段時間嘅am730讀者，每逢星期二都可以睇番夠本。話說CK身為中環一名普通中小企老闆，為人低調，筆下職場人事幾精彩都好，自己卻從不露面，比賭神更神秘 (賭神最少都影過一張背面相)，以免影響工作。但佢話都試過一兩次，有下屬在言談之間懷疑佢識得CK，甚至覺得佢可能就係CK，所以佢下筆要更加小心。
至於am730新的職場版，編輯話逢星期二至四見報，除CK專欄外，仲有職場專題，例如最近熱話嘅加人工，及年尾appraisal百態等，其他就賣個關子先。