各位乘客，有無諗過可以砌港鐵？Ray都想呀，因為啱啱知道港鐵將於下月2日起一連四星期，推出限量版「MTR x nanoblock」紀念車票套裝，售價150元，包括一張紀念車票、一個精美票套及一盒nanoblock微型積木組件套裝，無論係鐵路迷或積木迷都啱晒啦！
限量版套票裡面嘅nanoblock微型積木組件套裝有4款場景，包括「機場快綫篇」、「東鐵綫篇」、「港島綫篇」及「輕鐵篇」，每盒內有最少170塊微型積木及一塊透明底板，組成後可拼砌出列車場景。留意番，各場景分別於指定期間發售；另外，仲有一個彩蛋，就係特別版nanoblock「南港島綫」亦於同日開售，每套賣130元，又係數量有限，售完即止。詳情可瀏覽 www.mtr.com.hk 或致電港鐵熱線2881 8888。