如果你已經打了半輩子工，當然知道面試和真正工作能力沒甚麼關係，就像談戀愛，不來個埋身肉搏不會見真章，但人事部經理們總要找個方法來揀人，於是上網看看顧問的罐頭文章兼抄考沒經考證的《Google如何挑選精英》等東西，變出一套看來刁鑽，但其實不過在假扮了解應徵者，被《福布斯》歸納為見工時會遇到的愚蠢問題套餐，嚟，埋嚟睇，是否跟你上次面試被問的一模一樣？小天后要戀愛也要搵食，所以預備了標準答案公諸同好，大家把自己的特色套進去修改一下，就可以輕鬆假扮被了解。
1.「你最大的弱點是甚麼？」(咪就係要打工先有飯食囉)
2.「為甚麼我要聘用你？」(公司要有啲人坐喺度先似樣嘅)
3.「你認為自己五年後會在甚麼位置？」(由小天后升上老天后)
4.「你最大的成就是甚麼？」(有個地鐵站叫「天后」啊，仲勁過天上有粒星星係你個名)
5.「如果你是一隻動物，你希望是甚麼動物？」(我屋企隻貓，佢真係識投胎)
6.「你能接受的最低人工是多少？」(一係低到可以即刻上公屋啦)
7.「你上一份工作的人工是多少？」(以前嘅嘢當粉筆字抹咗啦)
8.「你的舊上司如何評價你？」(佢話我好大方，因為 有佢好多痛腳喺手我都冇用)
9.「甚麼條件令你成為出色的人？」(我日日化妝面色好好㗎)
10.「你能給我們的團隊帶來甚麼新元素？」(天后墮入凡間，同事返工直情好似做緊TVC劇集咁！)
想請我？聯絡AM730編輯或者Facebook我啦！
伍諾韻
www.facebook.com/littlelovequeen
周二、四刊登