Chanel原本計劃將2020 Cruise搬來香港行一次，上周因為形勢不明朗宣告取消。
因為跟老死大半年無聚頭，就算見都是夢中見，上周終於約得成飯局。早已響應減少消費，於是消費都要盡量幫襯良心小店，方才發現這個「黃絲消費圈」都算(可能)有小成：銅鑼灣周末想book張四人枱，多間小店都爆滿，定抑或我想得太美，爆滿是因為選擇太少，反而通街都是揀唔落手的藍店。
Any肥，少不了談近況，尤其是香港的近況。老友以前也是行家，做過一陣子同事，也曾患上購物成狂，屋企沒有金礦可以慢慢搣，買嘢衝動仍勢兇夾狼，卡數找極找不完。近年不在雜誌界打滾，沒有季季追新衫新袋的壓力，加上年事已高(笑)兼已成家立室，購物狂病自然不藥而愈。
高瑞時裝雙位數負增長
席間談到班商家佬牙痛咁聲，尤其零售業講到自己就快死咁滯，有T字頭英國牌子說，這兩個月簡直白交租，本地消費意欲低迷，自由行又斷纜(根本就是過分依賴單一客源，自食惡果)；也有黃絲食店剛斥巨資重新裝修，就迎來一場反修例運動，好在經社交網絡一傳十、十傳百，大家踴躍幫襯，苦況扭轉過來。
香港佔全球奢侈品市場營業額約5-6％，跟法國相若，以單一城市來計，能有此成分額，其實真係唔嘢少。零售界流傳一都市傳說，某高級品牌香港旗鑑店全年營業額，年年入品牌頭三，從未跌出三甲榜。
根據瑞銀(UBS)的數據，在奢侈品零售商中，歷峰集團(Richemont)最受影響，估計其11%的銷售額來自香港。Swatch Group則有約10%的收入來自香港，而香港Burberry也佔總銷售額的9%。受影響較輕微的高端品牌，瑞銀點名形容為「at risk」的，有Hermès、Moncler、Prada、Tod’s、Ferragamo、Kering和LVMH。咪即係全部咁滯？！不如數下有沒有品牌不受影響好過啦。多個品牌都已經調低今年香港的增長預測，甚至估計會有雙位數的負增長。
創新設計應從環境著手
我跟老友都同意，近年時裝業早就應該實現負增長，不是我們心地不好想壞人衣食，而是盲目追求增長的代價，就是對環境的破壞，而且還是不可逆轉那種。諗起格陵蘭冰川融掉的面積，有不知幾多個香港咁大，亞馬遜雨林不斷燃燒，同時間香港又硝煙四起，大家都同意今次運動不是endgame。老友育有一女，今年10歲，她感嘆，幾年後可能女兒經已要「披甲上陣」，要勸阻也勸阻不來，難道眼睜睜看著女兒去「送頭」？我比老友好一點，無人無物，老友笑說，不如推我出去食彈好過。
今日時尚真係好多時多嚿魚，無嗰樣整嗰樣，好似這個明言為末日而設計的紐約新生品牌Øblanc，如此設計我真係理解不能。
上晒神枱的如玲姐，她的CDG都要繼續吸水，但enough is enough，夠了。