雖然我係靠化妝搵食，教人唔化妝set頭，好似倒自己米。但係可以令大家更加靚，我都好開心㗎！其實靚有好多種，今次就同大家分享，比裸妝更接近零嘅打扮心得。
健康等於美：體弱多病唔精神，化幾多妝都冇用！所以要靚，第一步就係要健康！大家都知休息，做運動食健康啲好緊要，但係香港人咁忙，想快靚正調一調理體質，可以試吓《時代周刊》都勁讚嘅西蘭花嫩芽(brocolli sprout)。西蘭花嫩芽有排毒同保護細胞功能，比成熟西蘭花多出10至100倍！佢仲可以啟動作為肌膚過濾網嘅蛋白酶體，將毒素排出體外，同時西蘭花又有β-胡蘿蔔素和維他命B、C，可以補充喺排毒過程中損失嘅營養。近年仲有專為環境問題而設計嘅測試，發現飲用西蘭花嫩芽素，可以排出體內有害毒素，仲有抗輻射效果。
最簡約護膚：我見過皮膚最靚嘅女人，都係搽極少護膚品嘅。想用最少產品達到美肌效果，我建議只用洗面梘同面霜。洗面可以用無香料嘅面部專用梘，面霜可以揀全有機嘅防敏溫和配方，搽埋眼都無問題。防曬方面，可以試用礦物防曬粉，比起防曬膏更清爽，有色配方仲可以改善膚色，睇起嚟又唔似化咗妝。
美眉常伴你：亞洲女士嘅化妝重點，眉毛應該係最重要，因為佢可以影響成塊面嘅輪廓比例。不過要畫靚眉，隨時要用成十分鐘，所以好多人選擇近期好流行嘅韓式紋眉。未決定紋眉前，我想介紹大家試吓One Week眉筆，好多連鎖美妝店都可以買到。我有名人客户出trip，都會book我用呢個方法畫好眉先上機，雖然多數last唔到one week，但係三、四日後仲有少少色，照住個型補色快好多喔！
粉紅咀唇：呢個比裸妝更裸嘅妝，對面青唇白嘅朋友可能有啲難度，但係只要用一支有染色效果嘅Lip tint，就可以令你精神奕奕。好似Sugao嘅Lip Tint，出外前印少少喺咀唇，可以令雙唇染上自然粉紅色，效果唔似搽兼超持久。
易打理髮型：最後我透露城中好多名媛嘅美髮秘密，就係搵Kim Robinson剪髮。佢有幾勁？名媛話俾佢剪完，之後自己喺屋企洗頭，是但吹乾個頭都仲好靚，仲keep到個幾兩個月。最秘密嘅係，因為阿Kim太貴，連身家過億嘅闊太搵佢set完頭，之後幾日都唔捨得洗頭，盡享咁靚嘅造型。
晨早起身已經靚爆鏡嘅大美人林青霞。