早前去置地唐人館食晏，友人預訂了一些點心菜式，看見餐牌上其中一道寫著「特別產品」，殊不知端上桌時竟然是菠蘿包中間夾住鮑魚！高級中菜館點心以鮑魚入饌，不外乎鮑魚燒賣或鮑魚酥之類比較大路的東西，而廚長張嘉裕這個鬼才創意澎湃，竟然想到菠蘿包和鮑魚二合為一變成「菠蘿鮑」，外表非常IGable，入口包身甜美鬆軟，鮑魚亦煮得夠腍。成件事毫無違和感，正式推出時肯定大賣，由食字到食味，這個菠蘿鮑都係世界級！
究竟點諗出嚟呢?「有一次同朋友們吹水時忽發奇想，想做一款同鮑魚有關的點心，很自然把鮑和包聯想起來，菠蘿鮑這個BB已在腦內懷孕。」張嘉裕說。
菠蘿鮑由懷胎到出世，廚長下了不少工夫。先說包身部分，按照傳統做法，麵包無非是牛油麵粉糖三種東西，視乎分量調節與烤箱溫度控制而已；而為了與帶點嚼勁的鮑魚結合，包身做得稍為軟糯一點。另一主⻆鮑魚，在試驗過程中用過吉品、南非、澳州、大連，有鮮也有乾的，最後發現新鮮的大連鮑最有Feel。坊間煲製新鮮鮑或罐頭鮑時，由於鮑身較軟，只能用煨的方法(即是用現成的鮑汁煮至入味)，而廚長為了效果理想，竟然把新鮮鮑當成乾鮑去煮，用煲乾鮑的原材料去慢慢燜，令鮑魚更為入味；最後，用牛油做載體，將中式鮑魚與西式麵包來個大融合，燜好的鮑魚用牛油大火煎香，淋上鮑汁後再放入包中，才大功告成。由構思到實踐，一步一步走來絕不容易，為了向廚長致敬，我會來食多幾次菠蘿鮑的。
菠蘿鮑$138—預計7月上旬推出，想食最好打電話去問定先。
置地唐人館│中環皇后大道中15號置地廣場4樓│2522 2148
同場加影
龍袍金玉(龍蝦腸粉)$388
龍蝦湯製成腸粉皮，色彩鮮明，餡料有本地有機粟米與新鮮龍蝦肉。吃之前廚長再刨一些蝦乾粉末灑在腸粉上，蝦乾由新鮮基圍蝦加海鹽醃一晚後風乾三日而成，增添鹹香，蝦到世界盡頭，而豉油亦用番茄煮過，每個細節都很講究，值回票價。