遊英國湖區坐古老蒸汽火車勁有Feel

我關餅氏是冇車之人，日常生活買餸在屋企附近有超巿商舖，不成問題！出去巿中心行街睇戲飲茶，亦都冇問題！但如果想去遠些的地方遊玩，有車的確方便好多。上星期住在Derby的大學學長譚氏夫婦，揸車來曼城探我和另一個無車階級的朋友Anthea。譚氏夫婦超好人，專登過來車我們去英國知名旅遊點——湖區Lake District (正式名稱是湖區國家公園Lake District National Park)一日遊，非常開心！

由曼徹斯特揸車大約2小時到Windermere的Bowness碼頭附近的收費停車場。我們沒有特別計劃行程，泊好車行去碼頭，發現有幾條觀光船路線可選擇，我們當日㨂了坐船去Lakeside再坐蒸汽火車到一個叫Haverthwaite的地方。船加火車當日票價：成人24.5英鎊；小童(5-15歲)14.7 英鎊；家庭(兩個大人加3個小童)71英鎊。觀光船有兩層，睇風景當然坐上層，沿途景光優美如畫。下層就有小賣部售賣啤酒、咖啡、三文治、雪糕等等。

去到Lakeside落船，建議不要四圍逛，最好即時行去火車站，否則錯過火車便要等成個鐘了。踏上燒煤炭的復古蒸汽火車，車廂的懷舊格調令人恍如回到過去，實在忍不住要瘋狂打卡。由於火車速度不高，可以慢慢欣賞窗外風景，沿路見到有人扒艇、遠足，途人熱情地跟我們揮手開心互動。整個車程大約20分鐘，就帶給我們無限歡樂。今次湖區一日遊唔夠喉，事關還有很多地方值得去，下次一定要plan好啲玩多幾日。