WAKO SAKE BAR│銅鑼灣摩理臣山道23號南洋酒店2樓│3619 5358
立ち飲み(立飲)，即係企喺度飲嘢，喺日本非常普遍，據說由江戶時代已經喺民間出現，不過二戰時期，曾經短暫消失一段日子(打仗嘛仲飲乜鬼，係都打完先飲啦)。所以，二戰結束之後，立飲又慢慢出現再迅速增長直到而家，由於不設座位，酒舖空間、設備&店員需求不多，所以價格較一般居酒屋便宜，成為日本最Hit品酒方法之一，仲喺每年11月11日制定為「站著飲食日」(立ち呑みの日)，因為1111好似一班人企喺度飲嘢。
酒櫃過百款酒任揀，睇啱邊支就自己斟，很爽。
Wako Sake Bar亦有佐酒小吃提供，揀漬物最啱。
最近，南洋酒店嘅Wako Sake Bar，將日本立ち飲み(立飲)移植咗嚟香港，過百款日本酒放題任飲，完全顛覆日本酒喺香港玩法，坊間一般日式餐廳開支清酒動輒一千幾百，Wako Sake Bar分別以$98(半小時)，$188(1小時)，$368(兩小時)任飲，以自助式酒櫃睇啱邊款可隨意自己斟，別以為放題會俾CHEAP嘢你，駐場名譽唎酒師Randy，喺日本搜羅咗唔少高價日本酒、果酒、燒酎等，更會按季節不定期更新酒單，當日我都飲咗幾款純米大吟釀，對酒迷嚟講真係幾抵玩。
WAKO SAKE BAR│銅鑼灣摩理臣山道23號南洋酒店2樓│3619 5358
當晚遇到兩支四割五分純米大吟釀京姫匠&北秋田，同樣係山田錦，邊支好飲啲？自己去試啦，放題啊！
栃木縣片山酒造的初代久太郎生原酒，酒體結構十足，入口緊密層次豐富，幾啱男仔飲！
ANCO紅豆乳酪酒來自兵庫，入口好似食緊甜品一樣，港女大愛。
溫州完熟蜜柑酒，一個完熟蜜柑造一枝，保存一粒粒果肉，甘甜可口，加冰飲最消暑！