政府研究徵收空置稅。(資料圖片)
突然間財經媒體和專欄都吹風話政府要搞空置稅，無聊再查看政治版、時事版，此風已經吹了一段日子。剛好撞正前日出席民主黨黨慶，親眼見證林鄭捐錢課金，兼上社交網站以「大和解」起題呃Like。
原來，香港不同光譜的政界、商界、媒體界都可以咁friend，難怪政府未講空置稅，已經咁多人保駕護航，反正大家咁熟，圈子內一早收晒風啦。
我考古故我在，原來自己寫過很多關於空置稅的文章，稍有經濟學知識的人，都知空置稅有幾唔合理。講香港的空置率，一定要由差餉物業估價署的《香港物業報告》入手，那是最客觀的數據佐證。根據2017年的報告，香港最新私人住宅整體的物業空置率只有3.8%，遠低於西方成熟經濟體。
當然，一定要班茂利會吹毛求疵，話大型私人住宅空置率有9.2%喎，既然咁高，一定要行空置稅去打擊樓價囉。大哥啊，小、中型單位都係3.3%左右啊，依家政界覺得樓市問題係上車問題，梗係望實小、中型去睇啦，大型單位關上車盤鬼事咩。當然，中、小型盤業主轉唔到大樓可能係社會階級上樓問題，但絕不是上車問題。
物業空置率本身已經低，睇埋《香港物業報告》的空置率定義仲搞笑，原文照錄如下：「正在裝修的物業一般都界定為空置。此外，有些單位在佔用許可證發出後，因未獲發滿意紙或轉讓同意書而空置。讀者應注意， 空置量與物業是否已由發展商售出無關。即使是已售出的物業也可能仍然空置」。
簡單來講，裝修、物業轉手交收包括賣樓花，都計空置率。如果咁廣闊的定義下，空置率都只得3.8%，你可想而知空置率係幾低，根本就無空間收空置稅，難道交收期、裝修期都要俾稅嗎？
以前行租金管制的年代，業主懂得巧立名目，利用傢俬費等牌頭收租金和管制的差價。同樣，空置稅一出，自己人左手交右手，租住自己人物業是其中一個可行的避稅方式，除非你好似控煙辦咁拉隊抽查，否則你都好難捉到班友。
香港樓價的確高，但空置稅係民粹口號，最忌為做而做，因為得益的只係叫口號的政棍。用番民主派反對政改最出名的口號作結：「情願原地踏步，都不要行差踏錯。」行空置稅，係絕對不會改善到問題。