提起沈大師，Loser可以講係又愛又恨，愛係佢曾經有一段時間擁有神級預測，只要你以佢嘅估計作參考，稍作調整，贏錢機會超過8成，準確程度教人驚訝！
點解恨佢？就係唔知幾時開始，佢嘅超能力突然消失，今次估中但下次又估錯，唔知佢開邊瓣，唔能夠用逆向思維投資，參考性大打折扣，教人無所適從。
辜勿論點，大師都可以話喺云云財經名嘴當中，提供好大娛樂性俾股民，其它唔好講，單係用玄學或風水去測市呢家嘢，為沉悶股市帶來輕鬆一刻，而佢平時一啲言論，亦教人開懷一笑。
最近大師就豪言壯語，話自己多次擊敗索羅斯，最經典一役係幾年前歐債危機，索羅斯叫一眾基金經理沽歐元，大師唔受佢「坤」，叫大家喺當時揸歐元，結果每歐元兌美元由1.21夾到上1.51，大師贏了漂亮一仗。
Loser絕對冇懷疑大師呢段文章，之但係咁，唔知大師有冇投入相當注碼去實踐自己嘅理念，根據佢內文咁講，只係叫大家喺當時水平揸歐元，咁即係話佢係口講多過做。呢啲紙上談兵，跟真金白銀去炒賣係兩碼子之事，事關你唔會有心理負擔，可以義無反顧咁下注，否則點解耀才早前股票比賽，位婆婆可以100萬贏咗52億（真實性教人懷疑，但辜且當真）。
仲有，大師段文講到自己好似跟索羅斯喺匯市大戰三百回合，結果將索老打到落荒而逃咁。坦白講，大師即使有投入資金，我諗都唔會好多，要離場或轉身冇難度，喺決策上自然輕鬆；相反國際基金投資龐大，要調配並不容易，考量點有好多，唔光係好似大師睇升跌就得，仲要睇實際點去操作執行。
好似大師咁講，喺紙上擊敗索羅斯，咁Loser過去亦曾經以大師估計對著幹，結果都多次擊敗大師；若然按呢個邏輯，沈大師擊敗索斯，我又擊敗沈大師，咁即係我肯定贏硬索羅斯。