當銀行家認為樓市不穩，可能已經太遲。(資料圖片)
近日物業市場鋪天蓋地唱淡樓市，不單止股市評論員，甚至一向睇好樓市的，都話樓市下跌。地產商當然不會講，只會做，靜靜地減價促銷，就算唔減價，就加大佣金以及回贈，做生意手法而已。
有一類人從來沒有說樓市下跌，大家可能忽略了，事實上他們是很重要，如他們稱樓市下跌，樓市真的會跌。因他們掌握最重要資料，就是很多業主供樓有問題，他們追數追到氣咳，大家都知道，他們是銀行家。
睇淡樓市的人會以移民、加息，甚至以收租業主會賣樓為理由，所以樓價下跌。其實，真正急於賣樓可能是財困，不過，不用勞煩他們賣樓，自然有財務機構代勞，市場上銀主盤不多，代表財困而要賣樓的人不多。
我問銀行家是否有很多人賣樓，他的答案很奇怪，「如問銀行借錢買樓，就唔會咁容易賣樓」，事實上銀行要賣樓的客戶不多，那些在財務公司用高成數按揭或呼吸plan買樓的業主就唔敢講。老實說，問過銀行借錢買樓知道要過五關，斬六將，不但借得少，仲要做壓力測試，隨時要求有物業父母簽擔保，咁困難才借到錢買樓，點會咁容易賣，更加唔會因加息而賣樓。大家認為，美國今次加息加得快，減息亦快，好似乾柴烈火一樣，一陣間就燒光。收緊租更加冇可能賣樓，除非是用BNO移民，如果唔賣，日後可能要同英國佬對分。銀行家話暫時不用擔心，我又唔係咁睇，當銀行家話樓市不穩，可能已經太遲，都是小心一些，暫時唔好咁衝動買樓。
作者為紀惠集團副主席及行政總裁