特朗普自己話自己團隊係歷來最高IQ。
從政係EQ重要過IQ，鬍鬚曾是一個例子。
特朗普正式就任美國總統，佢老哥話自己團隊係歷來最高IQ，事實係咪，真係唔知，但特朗普EQ就肯定唔係最高，甚至應該係低水平。
坦白講，IQ高並唔代表成功，從來冇聽過李嘉誠、李兆基IQ爆棚，做生意成功，EQ佔主要因素，反之IQ愈高之人，好易被天才所誤。
三國時楊修之死，就因持才傲物，吓吓要表現自己過人之處而招致殺身之禍。近代啲睇，70年代香港有條𡃁仔外號神童輝，心算快過計數機，上電視表演令全香港人嘆為觀止，唔少人認為神童他日必然無可限量，甚至可以成為愛因斯坦。結果呢，因為細時被人迫計數，日日訓練，令佢對數學產生厭惡，聽聞長大後做咗肉類分割技術員，即係乜？咪就係豬肉佬囉。
投資最重EQ
從政係EQ重要過IQ，你睇鬍鬚曾，做財爺hea足十年，但EQ高，甚少發脾氣，懂得打哈哈同忽悠市民，結果民望反而最高。其實唔單止從政或做生意，投資亦如是，EQ往往最重要。
陸東做分析員時係威係勢，轉行做基金經理後，親身上場操盤，個基金連連跑輸大市，最後以結束收場，點解？除咗時勢或者運氣外，跟佢本人EQ有一定關係。
喺度講個故仔，就知佢EQ好唔掂，話說有次電台請佢做節目，陸生話唔可以有其他記者出席，點知有啲媒體收到風，走咗去電台等佢，陸東到埗後見到有記者，竟然發脾氣拂䄂而去，成個節目俾佢搞到收唔到科。
陸東淪落到炒殻股
你話喇，作為一個基金經理，市場千變萬化，若然EQ唔夠，市好時你意氣風發，市差時你急燥煩亂，點可以管理好隻基金，唔通大跌市時，你大發老脾就可解決問題？
最近佢又東山再起，走咗去炒殻股，嘩！堂堂價值投資忠實信徒竟變了炒殻股，即使能一時賺錢，都背棄咗自己多年信念，你聽過巴菲特專炒賣殻未呢？