法國如願奪冠，愉快世盃總留下一啲啓示，好教新世代足球全新定位。新世代個人主義高漲，社交平台上個個都係球評家，但喺世盃戰場國家利益為重，今屆球隊內訌新聞，絕無僅有；以往搞事最叻嘅荷蘭冇份踢，非洲球星多喺歐洲球會搵緊大錢，冇再為雞碎獎金拗數；連出名黑白不和嘅法國都團結一致，20年後再度登基。
以往見到頂級球星鐘意變髮、標奇立異，今屆卻絕無僅有；墨西哥以為分組賽打敗德國好勁，去到淘汰賽鬥巴西，有部分球員包括「小豆」染金毛迎大戰，喺場上仲一開波跟巴西對攻，自招敗辱。球王級C朗平頭裝樸實無華，連愛出風「頭」嘅保羅普巴，都專心做好防中，助攻助守，你話基沙文法國最好，我話最驚喜係普巴，曼聯領隊摩連奴來屆笑得落了。埃及美斯及瑞士美斯早早下馬，克軍有金球獎得主莫迪歷功敗垂成；法國奪冠靠眾將各司其職，實無一人突出。新世代足球，球隊要成功要打整體、瓣數多；球賽命脈，未來信晒VAR，是喜是悲？