以加里夫巴利嘅級數，32歲就投身美職好意外，人工只係佢喺皇馬嘅二十五分之一；估計「大聖爺」一心求安穩，等世盃帶領分組極有利嘅威爾斯踢出好成績，之後仲大把路揀。巴利踢法極具侵略性，又成日係奠勝球主角，場上永遠吸睛；熱刺前波士哈利列納曾形容高峰期嘅「大聖爺」，係美斯同C朗之後最佳，不過就話巴利自信心一般、非常沉默。美職以區內最高水平嘅中冠盃做指標，近5屆只有今年由美職西雅圖海灣者捧盃；計世盃外，美國今屆屈居加拿大同墨西哥之後，巴利好難喺美職極速提升戰力同自信心。再講美職賽程頻密，作客路遙，佢今次短約投FC洛杉磯，唔會有好多時間打至愛嘅高球，隊波由墨國名將卡路士韋拿領軍，一向攻力出色；反而意大利鐵衛基亞連尼今夏加盟，對呢支「黑金兵團」更有影響力。現時美職最高薪嘅係瑞士「矮腳虎」梳頓沙基利(人工高巴利4倍有多)，但佢踢緊嘅芝加哥火燄包緊尾，想喺美職標尾會嘅歐洲名將一向唔易，巴利有冇當年碧咸同伊巴嘅鬥心？