以為熱刺要還球場債莫財，又突簽西班牙新星左閘利古朗同「雪到硬晒」嘅前球會猛將加里夫巴利。不過，熱刺近年簽嘅新兵多數唔對辦，例子包括上季用咗球會紀錄轉會費簽入嘅中場尼當比利。主帥摩連奴正面對有機會29日內踢9場嘅「瘋狂」賽程，新兵又未融入，以佢唔多鍾意輪換嘅作風，今晚英聯盃作客奧連特焗用二線兵，晉級唔強求，以留精兵禮拜四「歐霸外」遠征馬其頓，作一場過決鬥，再喺禮拜日返主場鬥紐卡素。面對瘋狂賽程，近年呢支北倫敦球會嘅「前鋒孖寶」哈利卡尼同孫興民，真係要好好保重。
喜見孫興民剛喺英超史上首次大四喜，呢個世代嘅亞洲球迷可以睇到老孫喺英超嘅飛快速度同把握力，係一種福氣；摩連奴賽後「踩場」突入老孫訪問，話哈利卡尼先係嗰場最佳球員。不過，如果呢對孖寶再係咁俾摩佬榨乾榨盡，對近年傷患唔少嘅卡尼考驗更大，或者摩佬有朝一日會改口話嗰位已連續4屆英超入球達雙位數嘅南韓人，先係熱刺最重要一員。