意大利要晉級世界盃決賽周，3月份必須於附加賽擊敗北馬其頓。近日，國家隊領隊文仙尼搞咗個3日集訓營，徵召36位球員，除了大部份歐國盃奪冠的骨幹成員外，名單上竟然重現「巴洛迪利」。巴神的國家隊戶口係36場14球，現役球員當中僅恩莫比利一人有更好成績，贏個馬鼻，15球。
今日，無幾多個人講得出巴神「流落凡間」去咗邊度，2018年起輾轉踢過5隊波，曾經被視為歐洲最有潛力的前鋒現時在土耳其聯賽效力升班球隊Adana Deminspor(得罪講句真係聽都無聽過)。不過31歲嘅巴神自從「下凡」到土耳其後，21場比賽有9球進帳，升班馬球隊在聯賽排第四，高過大家熟悉嘅比錫達斯、加拉塔沙雷同埋費倫巴治。
一直以來，質疑巴神實力的人不多，10年前，球迷對他的期望就好似今日的Haaland一樣，只是後來大家更喜歡關注他的場外花邊。不過土耳其的傳媒就話「巴洛迪利今季賽事好專注，場外新聞唔多，而且挑起大樑」，意大利球評就形容徵召巴洛迪利入集訓營係「買返架二手車」，不過大家對文仙尼仍然有信心。被問及巴神有可能重返意大利國家隊，Adana Deminspor嘅老闆話「一開始佢選擇我哋而唔係去中東或者其他聯賽掘金，就係為咗重披藍色戰衣」，如果班主所言非虛，巴神真係生性喇，若然成功重返國家隊，故事就更勵志。就快新年，希望激勵吓各位讀者，只要堅持，一定有希望！來年最緊要身體健康，明年再
見。 唔再係電台主持，自己搞YouTube 頻道。標準球迷，從小睇波變成夜鬼，兵工廠係我信仰。