世界盃從來都係新星嘅夢劇院，配合柱躉中鋒「真9」戰術翻生，有呢兩項條件，今屆必具爭霸實力。兩大球王提早同世盃講拜拜，但唔少新星繼續搏命為國為己爭上位。未計禮拜一兩場戰果，射手榜領前嘅係3大熱門——禁區攻門如有神助嘅哈利卡尼、噸位足嘅「最強真9」盧卡古同近年罕見「電兔」基利安麥巴比。其實3人喺4年前世盃，只得盧卡古為比利時上陣兼入過1球，其餘兩人冇份，法國同比利時8強止步，英格蘭更加分組賽包尾出局。時移勢易，愈嚟愈多人睇好英格蘭入決賽，主因係所處線路強敵全去，而且英軍今屆活力足、無星勝有星，更有卡尼呢位代表國家隊26次已入18球嘅入球機器；更利好係今晚鬥哥倫比亞前，又傳對手主將占士洛迪古斯要紥住上陣。睇占士上仗傷出後，哥國踢開兩截，今晚一班幼獅只要喺中場全力截斷射手法卡奧嘅補給，勝望自然高。
