安東尼
身價8,000萬英鎊嘅「自轉王」安東尼馬菲奧斯，由曼聯借去西甲貝迪斯，連續3場入波，3次攞全場最佳，一走成名。巴西前鋒今屆喺英超普遍唔順，計傳統Big Six仍有「活動」能力應該淨返曼城嘅沙維奧，上位反而係狼隊嘅馬菲奧斯根夏。喺被譽為世界競爭最激烈、體能要求最高嘅英超，賣弄花巧嘅安東尼，冇辦法展示個人盤扭花招，反成英超笑話；被認為係前阿仙奴嘅非洲翼鋒尼高拉斯比比之後，英超近年另一經典水貨，比比咁啱現時喺西甲維利拉爾打滾。
安東尼去到貝迪斯專注踢右翼，主帥「工程師」柏歷堅尼叫佢踢得務實啲，唔使成日晒腳法、少啲犯錯，每場做返兩三件重要事情就夠，不愧老江湖。佢啱啱對皇蘇凌空側身靚射入波，難度唔細；西甲係唔少著名巴西射手嘅英雄地，皇馬有三寶，巴塞王牌係拉芬夏比洛尼，始終又重技術多啲，防守對抗性冇咁硬淨，就算貝迪斯夏天冇錢賣斷，24嘅安東尼繼續爭氣，唔愁冇班落。反正紅魔前路茫茫，趁當打早啲跳船，挽回身價，唔好回頭喇。