森林癲極有個神奇領隊
英超升班馬森林今屆其實比車仔更癲，簽入29位新兵；對返佢哋今屆英超升班後首戰吞紐卡素2蛋嘅正選11人，同啱啱贏列斯聯場波比較，得返3人仍然踢緊正選。榜首阿仙奴同期對比，只得箭頭由受傷嘅「耶穌仔」換咗尼基迪亞，榜頭榜尾套路唔同，其實一樣有方法可以玩得精彩。
森林癲極，都好在有個全英超最低薪之一嘅神奇領隊谷巴，之前未教過英超；但自從去年10月初球隊最低潮照同佢續約到2025年，佢成個人開竅咁；球隊出場陣容星期美點，但防守變得極硬朗，先求唔失，前鋒爛打橫衝直撞，比賽觀賞度低但護級至上。森林去年10月以來，贏過5場英超，4場1比0、1場2比0，希臘船王班主瘋狂開支票買人求護級，遍及五大洲球員，出手極高、眼光唔錯；單係剛借到PSG嘅世界級鋼門基羅拿華斯踢半季，拍爛手掌(據報20萬鎊周薪、兩會分擔一半)，有錢唔係隊隊都識得使。谷巴呢條英超領隊命，已勝過名宿謝拉特、林柏特，分分鐘長過續咗約嘅高普同哥迪奧拿。