英超太激，加上今屆球季喺世盃快到嘅扭曲下，季初心態不論擴軍同場上表現，個個要谷盡。結果，以英超傳統Big Six為例，車路士、利物浦及阿仙奴，中場已現傷兵潮；連奪標大熱曼城有4位中堅喺手都唔安心，埋門都panic buy(搶購)唔起眼嘅多蒙特中堅艾簡治，估計今晚起開打嘅3大歐洲賽，作用之一係鬥邊隊肯俾二線兵多出場盡快上位，補充主力兵源支援重心嘅英超戰場。
上屆歐聯，英超4強喺分組賽3冠1亞晉級；今屆踢歐聯嘅英超4強，較擔心係利記，聯賽已要場場出兩大新人中場撐場，今屆A組嘅對手又唔曳，兩線兼顧恐患得患失；最想睇曼城同熱刺，分出祖利安艾華利斯(圖)同李察利臣擔正打箭頭，得成大器嘅話有利英超爭霸。曼聯同阿仙奴今屆踢歐霸係大超班，分組賽踢禮拜四，之後通常周日踢英超，踢得咁密輪換更狠。看過「魔仙戰」嘅廠迷都希望俾新兵攻中法比奧韋拉喺歐霸擔正；魔迷當然期望儲夠火嘅老球王C朗，禮拜四鬥皇蘇首次擔正，領軍橫掃歐霸，向坦帥一顯顏色。