當代頂級足球，整體戰比以往更整體，前場開始壓逼，球星個人技術層面淡化，體力強、速度快、大件頭著數。球壇暫未見有新球王出現，以本月底揭曉嘅金球獎為例，超過廿年來首次冇咗C朗同美斯競逐，大熱得主係從未入過三甲嘅皇馬射手雲尼斯奧斯祖利亞，上屆喺皇馬贏盡榮譽；但其所屬嘅巴西表現一團糟，大膽講佢只係「庸中佼佼」，球星未係球王。
37歲美斯，傷後上仗世盃外作客委內瑞拉打水戰踢足全場。39歲C朗對上出賽12次，有11場入波，游走沙特職、亞冠盃同歐國聯，極少「射波」扮傷唔踢，向不可能嘅個人1,000球進軍。可惜近年最接近球王接班人嘅新皇馬球星，貴為國家隊隊長，疑似扮傷唔踢歐國聯，並傳已通報往後重要賽事先會為國家效勞。國家隊打贏以色列當晚，又被拍到北上瑞典食晚餐再蒲吧，今屆金球獎三甲應該冇份；同前球會打官司追討欠薪、喺皇馬唔fit未企穩，新聞多多。呢類力量型球員，年紀越大，只怕身重易傷，球王之夢，先得「發」財個發字。