武漢肺炎疫情未肆虐歐洲，英超生意照做，上月錄得史上第二高嘅2.3億英鎊冬窗交易；不過，關窗當日嚟個反高潮，唯一大刁係近年成日入錯貨嘅韋斯咸，1,800萬鎊收購英冠前列射手查洛保雲救亡；更矚目當然係恩哈路呢位30歲嘅非洲人，竟然由中超超級反彈返英超豪門曼聯。紅魔收入常創新高，為保費Sir嫡系蘇斯克查帥位，重金簽葡國中場猛將波基斯費蘭迪斯，希望博返入歐聯唔奇；但錢多唔代表吸星力強，左揾右揾，據報關窗日當天午後，高層先急急揾恩哈路經理人傾「刁」，曼聯簽佢到季尾，肯出佢揾緊嘅三分一糧，即係10萬鎊周薪，另外上海申花袋數百萬鎊半季借用費。咁婆乸數嘅交易，紅魔好少有。
恩哈路3、4年前同舊拍檔迪尼喺屈福特打雙箭頭，曾一季共取28個英超入球，之後臨離開英國去中超，前嗰半季已大跌watt，唔識入波；年紀已唔輕，仲要佢返嚟打單箭頭，速度同入球能力打個大問號，又睇下蘇帥趁歇冬帶隊去西班牙南部度假兼集訓，返嚟練到乜嘢神乎其技鬥車仔。