好耐未試過，聖誕新年賽期，仲未睇過一場英超早場；但新變種病毒無阻賽會硬上弓嘅決心，除非你多番證明隊波五勞七傷，好似愛華頓、屈福特及般尼咁，不斷改期。其中愛華頓上次焗鬥車仔，出了32號、50號打正選，61號及62號後備出場，全部大冧巴英格蘭牛奶咀，咁殘陣都作客打和車仔，值得尊重。危中有機，如其成日等射手卡維特利雲傷好、李察利臣又躁底亂大謀，英超密踢打體力同熱誠，賓帥俾多啲機會年輕人，當中可能係愛華頓明日之星。
疫情下照妖鏡，周薪35萬鎊嘅阿仙奴前隊長射手奧巴美揚，原形暴露。唔係佢違隊規被雪，主帥阿迪達未必咁狠，全用小兵狂攻對手。據統計，現時阿仙奴32個英超入球中有16個由21歲以下球員取得，單係布卡約沙卡同伊美路維呢對「7+10」號孖寶，入球助攻不停，帶動阿仙奴暫時係新疫情下嘅大贏家。好喇，小兵今晚唔使鬥狼隊，留力1月1日主場早場鬥另一疫情下毫無受損嘅霸主曼城，呢場「疫情下最強」對決，唔會改期啩。