英超年尾大預言
連續3個月嘅國際賽，打殘唔少歐洲強隊，包括西甲兩大新星打完國際賽，今年可能提早收工，英超隊優質兵多亦難招架；唔少大隊早前聯賽已要用青年軍撐場，實屬罕見。英超去到年尾例牌上演瘋狂賽程，喺未來6星期內各隊起碼要踢8場英超，終極考驗當然係年尾8、9天內連踢3場波；上屆曼城仲可以年尾前歎慢板，後上擒阿仙奴，攞埋三冠王，只見王牌射手夏蘭特季初唔少場次被嘜死，佢哋早前連環畀主場嘅狼隊同阿仙奴殺敗唔係偶然。今屆邊隊攞冠軍，埋單80多分夠數。
英超新興力量今屆沉醉歐洲賽，反而唔使踢嘅「倫敦雙雄」熱刺同車路士，勢成餘下三分之二賽程嘅爭霸要角；尤其車仔連鬥強敵入完4球又4球，近年Big Six對決罕見，一大班年輕優質兵終於上力，車迷雀躍，只差藍月12分，未必冇得追。下游原本應該平淡，結果突爆出愛華頓扣10分，令3支升班馬士氣大振，連同般茅變成「5降3」格局；盧頓早前打和利記，入冬場濕地滑打簡單足球，同實而不華嘅錫菲聯，未必一升即降。