英超本周煞科，冠軍、歐聯席位和降班球隊仍待分曉，但來到季尾總要盤點一下本季英超之最。
最成功收購：毫無疑問是艾歷臣。這位在鬼門關折返人間的丹麥中場指揮官加盟賓福特，功架毋庸置疑，將球隊串連起來令攻守轉換更流暢。球員自己表達了下季希望為「歐聯球隊」效力，最後會「愛回家」重投熱刺還是飲水思源留效賓福特也好，每位球迷也會為他能夠繼續馳騁感到欣慰。
最失敗收購：C朗。我知，一定有好多球迷反對。關乎數據，C朗今季多次「救全家」，「如果唔係C朗，曼聯排名一定更後」，但老實講句，C朗手執球壇牛耳，除了數據，「令隊友也可以有更好表現」才是球迷們真正期待他能夠做到的事情，就如前文的艾歷臣一樣。但是今季曼聯球員的態度和表現均令人失望，馬古尼因為「隊長身份被模糊」陷入信心危機變「麥麥送」，般奴費南迪斯大跌watt、辛祖整季未如人意，全部環環緊扣且與C朗加盟不無關係。
最喜出望外領隊：韋拉。猶記得開季時韋拉是「第一位被炒」領隊的熱門，但今季韋拉的教鞭「神出鬼沒」，鞭過曼城阿仙奴之餘，今季更帶領水晶宮進佔中游位置，熱刺、愛華頓、列斯、般尼就連曼聯的領隊相繼烏紗不保，韋拉依然「穩陣」，令不少球評大跌眼鏡。
最「奈佢唔何」領隊：鶴臣。這位老牌教頭1月走馬上任頂替雲尼亞里執教屈福特，最終球隊護級失敗。但鶴臣也宣布了下季將退休，雖然球隊來季將於英冠比賽，然而鶴臣已經係「局外人」，比賽完結後仲可以開心握個手。本身有一定壇數，大半生貢獻足球，雖然屈福特球迷不好受但也沒有批評這位老牌教頭的舉動。 標準球迷，從小睇波變成夜鬼，兵工廠係我信仰。