英超停擺近兩個月，據報若然今季報廢，20間球會嘅損失會合共高達10億英鎊，可以理解唔似一海之隔嘅荷甲同法甲，可以果斷煞停咁簡單。歐洲5大聯賽嘅德甲同意甲都好想復賽為今季埋尾，意甲已准許球隊復操，但單係効力祖記嘅球王C朗仍滯留葡萄牙家鄉，已係一個問題；德甲原本走得最快，但科隆喺操練後驗出有3人「中招」，德國人做事謹慎，歐洲各大聯賽喺5月空白嘅機會愈嚟愈大。
新冠肺炎仍然肆虐歐洲，英超所謂「重啟」大計只係訂出8至10個中立場為復賽做好準備，但團體復操後會有頻密嘅埋身搶截已係一大挑戰，唔少外國球星亦需時回英隔離再歸隊；若能復賽，場內可做足安全措施，但熱情嘅球迷會照湧去中立場嘅場外捧場。英國首相約翰遜會喺本周中為封城令發表新講話，可能係決定英超今屆生死嘅重要指標，紅軍球迷應該最關注。世事往往出人意表，估唔到新一季韓職本周五搶閘開鑼，留意一眾「太極虎」嘅表現，總好過體育新聞睇到歐洲三流嘅白俄波啩？