踢唔到歐聯未必壞事
英超煞科，唔及德甲精彩，倫敦球隊最終喺歐洲賽席位罕見幾乎全面淪陷，只剩阿仙奴近3年排名「3級跳」入得返歐聯；但來屆列強又會加碼擴軍試撼「獨大」嘅曼城，格局又變。踢到歐聯仍算攞大獎，2021/22年分別入到4強及決賽嘅曼城同利物浦，執到1億英鎊；反而入到其餘兩盃對英超球會嚟講，唔會好巴閉，韋斯咸今屆更幾乎玩出火。領維拉大翻身嘅主帥艾馬利，領軍大賽經驗足，來屆只係踢歐協聯，隊波再執兩、三個當打實際嘅西甲兵可以應付到。
相反白禮頓今屆打到曉飛，其實反映部分列強嚴重失準，唔少主力都有離心，亦唔會甘心多留呢個南部度假城市；阿根廷全能中場阿歷斯麥阿里士打，準備7,000萬英鎊投利記，影響極大，當新軍又要兼顧來屆歐霸，踢法已被洞悉，呢個「海鷗」嘅歷史時刻，亦可能意味危險日子走近。
缺席歐戰，未必壞事。熱刺肯放走今夏30歲嘅哈利卡尼，套現1億英鎊換血，咪當自己來屆歐聯入咗4強，快速大換血、換帥圖強先係正途；車仔有大水喉又有名帥普捷天奴上場，球迷期待佢有時間執好「英超星期美點」陣容，領軍谷底反彈。