曼聯今屆由隊長馬古尼、中場保羅普巴，以至前鋒福仔，個個做代罪焦羊；由「槌仔幫」韋斯咸回收嘅連格大爆隊內更衣室係「災難」係想博走人。杜曹、高普崇拜嘅德國足球教父蘭歷克，下屆上到神枱做紅魔顧問大問號，未來新帥坦哈格嘅前景，冇乜人敢做「大好友」。不過幾爛都好，唔信紅魔季尾專登放棄，缺席來屆歐洲賽，等新帥從頭再來。再睇返英超來屆歐戰席位形勢，會有7至9個名額，視乎踢緊歐霸嘅韋斯咸同歐協聯李城最終成績同聯賽排名；紅魔命運更會掌握當年費Sir接班人莫耶斯身上，當年「莫天才」教了大半季已被炒，現時領「槌仔幫」後天喺歐霸鬥法蘭克福；若果最終領「槌仔幫」贏到歐霸，可以直入來屆歐聯分組賽，到時英超會有5隊列席歐聯；第6名踢歐霸，第7名踢歐協聯。英超兵鬥德甲始終係上風波，「槌仔幫」有咁大野心，分心亦影響緊聯賽成績，間接有機會放生曼聯。當然紅魔同一晚英超補賽迎戰前途不明嘅車仔，自己都要爭口氣啦。