英超夏季轉會市場仲有十幾天就關閉，但英超六強呢刻全部唔喺歐洲，包括喺香港嘅「藍月」曼城。列強揾緊真銀之餘，除咗車仔唔准買人之外，都有機會做緊「大刁」。阿積士金童馬菲斯迪歷特半爆冷去咗祖記，令到効力緊李城嘅哈利馬古尼，成為下一位最受矚目嘅世界級守將。從多角度睇，好難理解26歲嘅中堅馬古尼嘅標價，呢刻仲貴過阿積士金童。只係英超一向冇常理，而馬古尼去季喺英超無疑再有進步，但嚴格嚟講技術一般，又唔似會有利記買到華基爾雲迪積克咁，再有升值空間。
當然，佢勝在頂上功夫出色兼曼市雙雄爭緊，李城又樂意放人，現時行情係去曼聯機會大好多。但要留意，曼城極缺英兵，夏天走埋戴爾夫，得番3人，遠遠唔夠條例要求一隊有「17+8」當中嘅8位土炮球員。簽到呢位大塊頭，可以拍史東斯踢雙中堅攻國內各盃，更重要係藍月一向鍾意同曼聯搶人，用半玩票心態應付亞洲4站比賽之餘，主戰場應該想季前同紅魔拗下手瓜先。