今晚英超場獨腳戲甚具睇頭，由李斯特城主場迎戰車路士。李斯特城今季表現神勇，聯賽連續8場不敗，取得6勝2和，前鋒占美華迪創下聯賽連續11場入球紀錄，球隊士氣及鬥志達到巔峰，只要保持佳態，絕對有力問鼎冠軍。車仔剛喺歐聯晉身16強，但聯賽成績未如理想，上仗主場0比1不敵般尼茅夫，現處下游位置，連一向寸咀嘅領隊摩連奴都表示，目標由前四改為前六。成績咁差，主要係球員同摩佬不和，影響士氣，但最近氣氛明顯有好轉，希望車仔可以重上軌道。對賽方面，車仔近6次到訪李斯特城，錄得4勝1和1負明顯佔優，但今季已經係一個唔同嘅世界，車仔要擊敗李斯特城談何容易，相信頂多和波而回。
