阿迪達未夠40歲，保養又得宜，濃密黑髮配一雙深邃嘅大眼晴，俾人行事堅定兼不易捉摸嘅感覺。佢上任阿仙奴領隊唔夠一年，球會場內場外變動不停，新領導班子借精簡人手，想一統各自管轄範圍嘅大權，可幸上季尾攞番個英足盃交到數，令「掃場」阻力大減；棄「重磅」嘅奧斯爾，「閃簽」鋼鐵防中湯馬士柏迪，新班子唔手軟。
英超季初多唔正常賽果，強隊發揮欠穩，但阿迪達由上季尾起一直貫徹保守嘅踢法；你話佢冇攻中冇創造性，喺贏曼聯場波，佢企硬收埋隊內唯一攻中丹尼施巴路斯，出今季回收嘅艾利尼拍湯馬士柏迪，全力掃蕩似佢當年踢防中。攻勢多用兩翼側擊繞過曼聯所謂菱型中場陣式，唔俾奧巴美揚打正箭頭兼鬥強隊多刻意縮後，拖慢行軍節奏，務求唔多失。阿仙奴今季冇一場波踢得精彩，但起碼係現時失波最少嘅英超球隊。睇到阿迪達嘅盤算，找對了年輕巴西中堅、鋼鐵嘅加納中場，下一步搵到似曼城中場奇雲迪布尼嘅奇才，先係時候打全攻型，同列強鬥癲。