摩洛哥薛耶治。
賽前本欄已講世盃是要尋找「大衛」擊倒「巨人」哥利亞，結果遍地開花，爆冷成常態，非、亞球隊愈戰愈勇獲好評，證大賽冇弱旅；呢屆騎呢季中世盃，早已埋下爆冷種子，甚至最新預測有黑馬會走得更遠，離冠軍好近。
進入第3輪，繼續預言世盃。卡塔爾唔得，但其他「真亞洲隊」都好醒神，沙特「接手」成主辦國，主場球迷情感傾注，贏墨西哥出線唔出奇。日本忽龍忽蟲，但又由攻變守，唔會怕西班牙傳控，夾手夾腳送德國出局？
伊朗紮醒，今晚鬥美國唔會係外界估計嘅下風波，和波即史上首次出線次圈。非洲隊呢？史上最叻有3隊唔過8強，今屆或者最終只有一隊入到16強，但呢隊係實力非比尋常嘅「阿特拉斯雄獅」摩洛哥。打和格仔兵、KO比利時兩大上屆世盃前列分子，貨真價實，上仗臨場用沙特球會門將把關外，其餘10名正選喺西歐搵食，防線4大將穩陣，全隊紀律好少攞黃牌；失意車仔、季初冇搏殘嘅薛耶治前線領軍，大打身價波。「雄獅」已睡醒，非洲破位最大希望。