五台冠軍的「EXIT」

郭富城相隔8年再踏紅館舞台，佢髮型討論度高到完全掩蓋一件威水事，就係天王新歌《EXIT》獲全港五個音樂榜嘅冠軍。

不過呢個大滿貫同網民對首歌嘅評價，可以話有天淵之別，好多人都覺得節奏麻麻，歌詞亦相當尷尬。我要強調，郭富城係好有型嘅，本文亦無意討論首歌好唔好，我想探討嘅係，到底香港樂壇話緊事嗰班人，同社會有幾大鴻溝呢？

行內人都知，要做到大滿貫並唔容易，人脈關係要打得好。八、九十年代嘅歌手個個想喺年尾頒獎禮有獎攞，唔只係勝負慾，而係當年攞獎真係會谷到唱片銷量同廣告收入，所以當時好多唱片公司，同各大傳媒音樂節目嘅負責人關係都好好，據聞仲個個星期一齊去玩，寓工作於娛樂。郭天王背後團隊都喺嗰個年代打滾過，如今演唱會正在舉行，團隊亦成功推到首主打歌橫掃五台冠軍。

今時今日，唔係話攞冠軍同攞金曲獎冇用，而係同當年嘅影響力一定差好遠，亦肯定冇一班傳媒同唱片公司高層心裡面嘅分量咁重。綜觀今時今日樂壇頒獎禮，叫仲有人談論下嘅叱吒，今次一樣俾天王首歌攞冠軍，咁大家都會明白所有頒獎禮背後嘅操作同價值觀，其實大同小異。再咁落去所有因歷史賺返嚟嘅三斤釘，又頂得幾耐？

當音樂榜同頒獎禮仍然存在，我唔會形容係「Who cares ?」攞冠軍同攞獎都當然開心，但作為呢個時代嘅樂迷，如果真係想自己支持嘅歌手同背後團隊，專注返喺啲真正重要嘅範疇度，我哋係需要好認真咁無視獎項，放低執著，話俾班媒體、唱片公司同廣告商知，受眾其實「Not so cares」。否則嗰啲公司高層同幕後團隊，就會一直輪迴30年前嘅手法，幻想呢啲叫做有noise同埋受歡迎，繼續分散資源同人力去「講數」同埋做埋啲無謂嘢，浪費時間。

畢竟，香港樂壇其實已經嘥咗好多時間。與其用資源同時間去「打關係」，攞所謂嘅成績，不如「EXIT」呢個遊戲，做返好首歌先啦，好嗎？