![修夫基](https://cdn.am730.com.hk/s3fs-public/styles/article_image/public/2024-07/15-8_0.jpg?itok=HO4HXzZr)
三獅迷多等2年
長陷錦標荒喺足球世界唔係奇事,但三獅再次失冠,矛頭無可避免直指修夫基,呢位計戰績被譽為近代最成功嘅三獅領隊。球隊眾星雲集,但踢法超保守,連續4場淘汰賽先落後唔係偶然;上得山多終遇「勇牛」,好運始終頂唔到尾,決賽賽果優勝劣敗。
修夫基最弊係成手好牌唔識變運,11個位置有8人係場場列正選,連埋另外兩守將捷比亞同馬克古希今夏都踢咗6場,主力疲憊活力不足;只係阿歷山大阿諾特初期打防中唔掂,肯即大膽用小將高比明奴。只見決賽兩閘勞基梳爾冇態、老將基爾獲加被對手快翼扯爆,勝負關鍵。
前線高爾彭馬如果換轉係一向重用小將嘅狂牛主帥調教,夾到祖迪比寧咸,二人應該係今屆歐國盃雙星,但彭馬實情只獲5次後備出場踢咗146分鐘。當修夫基4領國家隊喺大賽走近,但總與冠軍無緣,應該係成手好牌唔識用;樸達、艾迪賀維、普捷天奴同高普係4大繼任熱門,如今自我告退,讓新來者放眼2026世盃。三獅迷等多2年,總有機會見冠軍返「家鄉」!