![皇馬巴塞三點不露](https://cdn.am730.com.hk/s3fs-public/styles/article_image/public/2024-08/16-06.jpg?itok=3Gra9MFX)
皇馬巴塞三點不露
奧運完後,各大台再度圍攻足球直播。now播歐洲波兼主力英超、無綫播香港時間下午嘅日職,開電視攻晨早嘅阿甲,各有各做;最可惜仲係西甲賽會浪費咗呢個全球最高水平嘅聯賽之一。
歐洲5大聯賽,4個嚟緊本周稍後全部開鑼,德甲守尾門;計技術水平同近屆歐洲賽成就,西甲更勝英超,世界4大最值錢球員3個包括祖迪比寧咸、基利安麥巴比同雲尼斯奧斯祖利亞,依家喺西甲。皇馬係世上最值錢同搵錢最多嘅球隊,巴塞今屆易帥、馬體會想大搞,呢3強對戰嘅可觀性同新鮮感極高。
當地賽會嚟緊第一周賽事雖然新安排,周四晚一連5天每天只踢兩場;但孭重飛嘅皇馬巴塞,頭4周賽事合共8場波中,有6場安排喺香港深夜3點半踢,幾乎「三點不露」,無視亞洲市場,只在乎當地人作息時間。港迷現時一日24小時都會留意住世界各地大小聯賽,只見西亞嘅卡塔爾同沙特超開賽時間,都識得喺英超夾縫中生存,西甲超然,只怕繼續係三強玩晒,難望壯大。