英超打咗5輪，各隊都應該有一套新求生手冊應用，強如曼城啱啱出兩位新人快翼杜古同沙維奧想扯開阿仙奴防線，呢招哥帥以往好少用；但二人技術幾一般只勝在高速，哥帥嚟緊仲有冇新招？
季初最具爭議嘅判決包括阿仙奴兩將因為被指拖時間，踢或掂到個波，攞「第2黃」出場；撇開球證執法準則，但阿仙奴咁就失咗4分，自己都要認真檢討。達Sir同教練團隊新季角球戰術已玩到屈機，叫啲球員咪腳痕踢走個波有幾難？另外，本季平均每場英超暫入2.72球，唔及上季破紀錄嘅平均3.28球，反而阿仙奴外、森林同曼聯守得幾好；不過輪到紅魔捱過魔鬼賽程，本周中起兩戰歐霸鬥川迪同波圖，聯賽要鬥熱刺同維拉。「光頭」坦克背負呢個英超大品牌，開季5場入5失5球，呢個「555」，球會上下唔會收貨；依家除咗新季唔識守嘅愛華頓「光頭」達治係下一被炒大熱領隊外，坦克都係莊家嘅熱門之選，都要盡快叫助手、傳奇射手「雲佬」為一眾前鋒開OT加操，除咗出色嘅公關技巧外，開多道求生門。