葡兵傲視英超
葡超喺歐洲屬一線尾，不過近年喺轉會市場深受歡迎，貨源尤其葡兵多優質，上屆計葡萄牙人有22位為英超效力，已壓倒有20人嘅另一輸出大國荷蘭。只見「兩曼」、利、車4強現時都有葡人做隊內重心，般奴費南迪斯、魯賓戴亞斯、貝拿度施華同迪亞高祖達，加埋車仔今夏撬走狼隊最勁射手柏度尼圖。富咸成功放售29歲嘅中場祖奧包連夏放售畀拜仁，大賺一筆；反而近屆最失敗嘅轉會係阿仙奴用約3,500萬英鎊買波圖新星法比奧韋拉，傷多過踢，難怪主帥阿迪達之後怕怕。
相反荷甲，阿積士同燕豪芬嘅精兵早被列強榨乾榨淨，今夏更無一人投英超，最貴暫時係白禮頓簽入名氣不響嘅飛燕諾荷蘭中場韋爾化；聯賽爭霸模式近似，對上5屆由3強士砵亭、賓菲加同波圖輪流封王嘅葡超，今夏仍任由列強挖角，包括PSG貴簽賓菲加19歲葡國新星祖奧尼維斯，暫時係今夏歐洲聯賽5大交易之一。荷蘭人可唔可以爭一口氣，要睇最大支持者、陣中擁有8位荷蘭或前荷甲兵嘅曼聯主帥滕哈格了。