英超唔啱老餅
頂級足球賽事越嚟越密，曼城兩大中場球星貝拿度施華同奇雲迪布尼，近期先後炮轟嚟緊呢年嘅賽程，令球員冇得休息、冇時間同屋企人同朋友聚會，個個掛住搵錢，罔顧球員身心健康等等。其實每年9月國際賽後，各隊終於齊腳，連場大戰等住上演，球迷期待；加埋今季歐聯行新制，列強多數加碼擴大精兵團隊，應付密集賽程。球員嘅出場次數唔係由賽會決定，係由各大領隊話事，上屆唔計門將，全勤(踢足38場)嘅英超球員得3位，全數中堅，包括威廉沙列巴、麥斯基爾文同達高斯基；其中沙列巴兼顧歐聯，肯定係上屆耐戰王，始終23歲仔踢咗英超唔耐，新鮮感同體力十足。所以睇返曼聯19歲嘅防中高比文奴，由上屆踢歐國盃決賽，到夏天休息唔夠一個月，開季後場場正選，都唔會覺得攰。
上提兩位曼城大球星，慶幸遇上鍾意輪換嘅哥帥，大哥輩唔使踢足英超，更唔會要佢哋屈就主攻國內盃賽。貝拿度施華一直想去巴塞，迪布尼對沙特油元心動，踢英超大會場數多，老餅唔易捱，考慮轉會都好合理。