最近開始咗個有益身心嘅新習慣，就係每日下午都預留一段時間嚟打機。打機對我嚟講都唔係新鮮事，特別在我嘅機友係我家姐。
我同家姐年紀相差六年，性格亦南轅北轍，連生肖都係相沖。細細個已經同佢成日鬧交，佢覺得我係一匹脫韁野馬，我則認為佢份人保守怕事。長大後雖然已經冇再鬧交，但近年佢做咗人媽媽，我又移居咗去外國後就更少交集。
都係最近幾個月開始咗一齊上網打機嘅習慣。遊戲最初由姐夫介紹，係一款網上捉迷藏遊戲。遊戲畫面並唔精美，原理亦好簡單。可是醉翁之意不在酒，重點係我哋會邊傾電話傾玩。有時聽對方講下一整天嘅總結，有時同對方抱怨吓生活，有時又講吓小時候嘅回憶，無所不談。已經接近兩個月喇，每晚等家姐嘅小朋友瞓咗，我哋就會相約喺網上見面，偶爾其他家庭成員都會一同加入。有一日家姐突然同我講：「每日都抽段時間同細妹傾吓電話，一齊打下機，感覺真好。」我不斷點頭，忍唔住喺電話另一頭開心笑咗出嚟。
冇諗過而家同家人距離遙遠咗，溝通嘅機會反而比同住時多咗，感情亦大大加深。人大咗各自各有生活，好難會每日抽段時間出嚟閒聊，所以我哋都份外珍惜呢個機會。沉迷電玩當然唔好，可是當網上遊戲能夠促進家人感情，都不失為一件好事。我已經開始期待聽日嘅下午喇！
