啲人話，女人要靚但唔可以覺得自己靚。要叻但絕對唔好太叻，要扮蠢但又唔可以蠢得晒喎。要瘦要細粒但切忌成日嗌住要減肥。身材要好但最好唔好有肉地。真性情絕對加分，但佢哋又會話：女仔人家講粗口真的好嗎？
年過廿五歲就會開始被列入中女，單身嘅話啲人會叫做剩女，有數個約會對象全世界就大驚小怪為你添上不檢點嘅污名。剛好另一半係外籍人士，男人咁做係為港爭光，女人咁做就叫「食洋X」。彷彿世上所有國籍嘅男人性格頭腦文化都係一樣，只有身體結構上嘅差異。結咗婚，不論男女被催生仔似乎係必然，但未有所得的話就一定係個女人嘅責任。無子喺古代更加係七出嘅理由之一，隨時俾人休都似。呢個時候男人仍然係喺事業上衝刺，但事業與夢想對女人嚟講經已變得好遙遠。傳統觀念話我哋知一個女人本應放棄一切去相夫教子。男主外女主內，能夠為家庭犧牲係女人嘅終極光榮。
呢個就係所有女人應有嘅命運？我唔認同，亦從來唔打算認命。
陳生個女、會計部單身女同事、Lily女朋友、家嫂、張生前妻、黃太，甚至孖女個婆婆……無論你喺其他人眼中係咩身份，別忘了你係你自己。
姊妹們，請將啲世俗嘅囉哩八嗦自動消音。願我哋能夠繼續勇敢去做我哋想做嘅事，放膽去愛，成為我哋想成為嘅自己。
