最近同老公好沉迷一套來自加拿大嘅真人騷《Consumed》。製作單位邀請咗一名收納整理專家同一名善於改造傢俬嘅木匠，到訪一啲有雜物囤積問題嘅家庭，並設法協助呢啲求助家庭丟棄全屋75%嘅物品，只留25%嘅必需品，然後進行改造。
儲物行為好多人都有，我自己都有儲埋儲埋一大堆食之無味棄之可惜嘅紙袋同紙盒。有趣嘅係片集中有比較極端儲物行為嘅人都有一個共通點，就係佢哋往往將物品同人嘅關係或一段回憶掛鈎，而唔係純粹覺得靚而唔捨得掉咁簡單。雖然某部份嘅內心好想放低回憶嘅重擔，另一部分嘅內心卻非常留戀過去，甚至因害怕內疚感而避免清理。要掉75%聽落確實好殘忍，但事實上大部分求助家庭接受家居改造之後都輕鬆不少。除咗生活環境好咗，家人之間嘅相處亦和睦不少。
人人都有一些難以放下嘅回憶、一些我們害怕會遺忘嘅人同事。可是日子還要過，要知道丟棄物品並不等於將回憶或對人嘅感情丟掉。將一啲自己不再需要嘅物品轉贈畀有需要嘅人吧，重新賦予物品新生命同意義，亦將自己從回憶中釋放。物品放久了會腐壞，但愛會一直留在中心歷久常新！
一起懷着感恩嘅心送舊迎新吧，沒有比能夠活在當下更重要的事。今日係年三十，我都係時候收爐喇。祝願各位新年進步，豬年見！
一名乾物女，過氣空姐，為愛由北區移居到北歐多年。熱愛地球同時喜歡講粗口，志願是能夠與動物溝通。