阿伯：柴醫，我有點怕死。
柴醫：有人會唔驚嗎？
阿伯：我一生無乜做過壞事，都買過旗，扶過阿婆過馬路，如無意外，應該上天堂。
柴醫：天堂好啊，驚乜嘢？地獄先驚被煎炒烹炸啫。
阿伯：天堂應該係老人院，大部分人都係老咗就死，平均年齡去到70歲，天堂人口老化得好緊要，而且唔會再死，只會愈來愈老，有幾百到幾千歲都有，一諗起通街阿婆，已經想死。
柴醫：你講得有道理喔。
阿伯：我好後悔，點解唔讀中醫。
柴醫：點解啊？
阿伯：中醫係天堂好吃香啊！
柴醫：😂😂😂😂死咗都無得退休，係天堂繼續做，你真係好鍾意返工！
阿伯：柴醫，你信唔信有天堂？
柴醫：我唔信，但我有啲驚，我驚最後真係有，耶穌嬲嬲豬，唔畀我上。
阿伯：我日日祈禱，我都驚啊！
柴醫：驚乜啊？
阿伯：我驚最後無天堂，我一世只係呃緊自己。
柴醫：😅😅😅