成日對住電腦，重重複複咁打字同撳Mouse，真係好容易會患上腕管綜合症、彈弓指同腱鞘炎。
A：「喂！你哋拆咗老細封開工利是未呀？舊年仲有一舊水，今年竟然封得嗰50蚊，睇嚟今年花紅都涷過水喇！」
B：「唉，搞到我無哂心機OT！今年係蛇年，不如大家諗吓點樣返工『蛇王』仲好喇！我諗到計，可以做少啲嘢，又保得住份工。」
C：「你咁有計，講嚟聽吓！」
A：「你想講用AI呀嘛！ChatGPT我用都咗一排，最近仲試埋祖國嘅DeepSeek。其實好多時打字、整Power Point同覆E-mail ，我哋都可以交畀AI做，慳返唔少時間！」
B：「係呀，我試過用AI生成文件同埋語音輸入，真係快過做咗廿年、依家仲用緊速成打字嘅秘書阿May。」
C：「咁快做完，交貨俾老細，佢咪俾更加多嘢你做！如果將來AI真係咁掂，分分鐘連我哋份工都會被取代！」
B：「你覺得份工緊要啲，定係命仔同健康緊要啲呢？你知唔知AI除咗幫手慳時間，仲可以預防職業病。我哋成日對住電腦，重重複複咁打字同撳Mouse，真係好容易會患上腕管綜合症、彈弓指同腱鞘炎依啲職業病。」
C：「講起我早排先至走去睇醫生，醫生話我依3隻手指成日麻痺，係因為有腕管綜合症。至於依隻中指，握實拳頭後唔識得伸返直，就係第三期嘅彈弓指，如果情況冇改善，仲要做手術先好得返。」
A：「除咗一對手，長期坐喺電腦前，有腰背痛同肩頸痛，都只係遲早嘅問題。如果用AI去提升工作效率，快手啲做完嘢，就可以成日起身伸吓懶腰，唔使坐到腰椎間盤都勞損突出，又可以行多幾轉去Pantry沖咖啡飲。」
C：「不過想『蛇王』就唔好匿埋喺廁所，坐成個鐘打機同煲劇喇！醫生話坐咁耐坐廁，好容易會有梨狀肌綜合症，即係坐骨神經痛嘅一種。」
A：「仲有呀，除咗減少重複性工作，原來AI仲可以避免工傷。例如用AI去監察員工嘅動作，提醒佢哋改善姿勢，避免勞損同受傷。依家啲物流公司，都開始用AI同機械臂去搬貨。就算將來失業，轉做藍領都無咁容易會扭親條腰。」
B：「係呀！返工搞到周身病痛，員工仲邊有生產力呀？識得善用AI去『蛇王』，我哋先有更多時間去進修，提升競爭力，同埋早啲放工，陪吓屋企人，呢啲先至係work life balance。」
C：「睇嚟蛇年真係要學識用AI，既可預防職業病，又多咗時間『蛇王』⋯⋯等我仲以為，AI只係用嚟P啲『蛇精樣』添！」
註：
- 本文並非建議打工仔「蛇王」，而是鼓勵大家善用AI來減輕文書工作量，從而預防患上腕管綜合症和彈弓指等職業病。
- 所謂「滑鼠手」，即是腕管綜合症；至於「鍵盤手」，醫學名稱為狹窄性腱鞘炎。
- 由於AI應用在近年冒起，因此尚未有大型臨床數據，去支持其使用可減少職業病和工傷個案。但醫學研究早已證實，長期使用電腦與患上骨科痛症之間的關係。
- 然而，假如將AI所省回來的時間，花在使用電子產品於娛樂上，例如是打機和滑手機，亦可引致彈弓指等勞損性疾病。
作者為骨科專科醫生