《我推的孩子》揭露演藝圈偶像與飯圈的黑暗面。
《全民造星Ⅴ》完騷前，無一位參賽是親生仔，包括三甲。
動漫《我推的孩子》集偶像飯圈與暗黑復仇元素，其中一段偶像參加戀愛真人騷，有人好扮嘢但全世界都好鍾意，有人傻豬豬咁率真又被網上欺凌到想死。當中有句對白係：「謊言是保護自己的最好辦法。」因為真人騷做任何嘢，大家左腦知道係節目效果，右腦仍然會入咗個藝人數。依家係大眾/爆料/網上亦真亦假嘅片言，都比太空總署話你知有粒隕石飛緊埋嚟更多人信嘅年代。真人騷賣真，加網絡放射，假嘢一樣獲得真感情。
你睇《全民造星》，今年其中一個話題係有冇邊個係「親生仔」？到底乜嘢係「親生仔」？通常係指同電視台已經簽約嘅藝人，譬如當年林峯，捧到去「亞太」；我收到嘅風係viu喺節目播完前，冇同任何一位參賽者簽約。
推論落去，有三個可能：1)我收錯風；2)製作團隊偏愛某部分參賽者，傳傳下就話佢係親生仔。當然製作組都可以剪得你好啲，但每次晉級都係評判決定，咁係親生仔咩？3）純粹有人「覺得佢哋係」，大家無諗真就信晒再輻射出去。
冇人一早簽咗viu，但我收到風，好多參賽者反而一早簽咗經理人。例如我好鍾意嘅一個rapper參賽者，聽講一早簽咗位好有經驗嘅經理人。睇佢第一回合rap時，有一句係寸另外兩位參賽者係親生仔，嗰秒我超high，覺得佢直腸直肚，respect。但佢最後講咗句︰「我愛王峰KC！」(被佢寸完嘅參賽者)。作為 rapper，寸係OK， 你即刻兜返？
而當我知道，一個有經理人嘅藝人，公開寸其實冇經理人嘅對手，我諗起黃子華先生嘅名句：搵食啫。當然，我係經理人都會叫自己個artist去《造星》，免費宣傳。
今年《造星》，冠亞同分，季軍仲三人同分，最後都係靠民選定高低，真正嘅《全民造星》，只係「甚麼民就會製造甚麼星」，「甚麼資訊就會製造甚麼民」。咁到底，甚麼又能製造甚麼資訊？
《我推的孩子》有一句︰「謊言，就是極至的愛。」