踏入4月，好多至愛劇集陸續回歸，應該係每晚追一套都睇唔切，只講Netflix今年預計推出的劇集都去到700套！(癡線的，有時間個腦都process唔到)如果煲劇是一項工種，這份工絕對不易打；暫時總結今個月必煲心水，算是給個指引俾大家。撰文：Carman Chan
最後一季《The Americans》
我覺得《The Americans》是近年最被低估的一齣美劇，年年《艾美獎》都有提名，但年年都名落孫山，十分戥其不值。講八十年代美蘇冷戰時期，一對蘇聯間諜夫妻潛伏美國境內進行間諜任務，二人由假夫妻、生兒育女作掩飾到發展出真感情，寫情寫人性的矛盾及掙扎非常深刻到肉，就算拿不到最佳劇集，兩位主角Matthew Rhys及Keri Russell應該一早攞視帝視后。
迷幻樂園《Legion》
第一季已經打破晒漫改英雄劇的常規標準，視覺效果、美指水平超晒班，第二季回歸首集繼續玩到盡，每格畫面都靚得來詭異，根本就是altered state，編劇個腦異於常人，一路睇一路會諗，「到底編劇take咗乜、啲嘢好靚喎！」至於脫離傳統敍事手法基本上唔使再講，要睇一般漫改英雄劇的，看《Legion》會覺得搭錯線，但入到局的會中到不行。
喜感驚慄《Killing Eve》
專寫城市生活小品的英國喜劇創作人Phoebe Waller-Bridge，前作《Fleabag》及《Crashing》又mean又黑色，兩套都笑到我標眼水，瞓身推薦。今次轉戲路改編驚慄小說，找來《Grey’s Anatomy》的Sandra Oh演英國軍情五處小職員，調查一連串政治暗殺案件，單睇劇種以為她大轉戲路，看了第一集竟然可以在驚慄片種保持她的黑色幽默，於MI5工作報効國家理應煞有介事，Sandra跟一班同事唱K又大談工作沉悶，那種調侃及厭世好中打工仔心理，雖然Phoebe退居幕後，但她那副厭世臉，卻活靈活現滲透全劇空氣中。
Cheap精油王《Trust》
明星撞衫時有所聞，家陣連題材都撞，這套跟Ridley Scott上畫不久的《All the Money in the World》一樣，都是講七十年代英國油王John Paul Getty個孫的綁架案，電影沒看無得比較，但此劇製作班底跟電影一樣強，《迷幻列車》Danny Boyle執導、老拍檔《Slumdog Millionaire》Simon Beaufoy編劇、《飢餓遊戲》Donald Sutherland做油王，睇到第三集，製作水準跟規模基本上是電影，美指soundtrack都極具視聽之娛，Sutherland做孤寒到極點的油王一絕，Brendan Fraser飾演西部牛仔探長一角，為全劇加添荒誕喜感，仲有飾演油王孫的年輕演員Harris Dickinson相當靚仔，更添煲劇動力。
立體說教《Here and Now》
上篇才罵《Here and Now》說教難頂，但Alan Ball這套言志作品，去到季尾終於滲出戲味來，經過差不多一季鋪墊，Bayer-Boatwright一家眾人的互動，角色塑造開始鮮活立體，入到局了，由步入中晚年危機的老夫老妻，到4個成年子女，每個角色都有大大小小不同的優劣點，亦因此覺得好真好「人」，做觀眾的開始relate同投入到，雖然個頭開得好差，希望靠季尾收復失地，HBO不要下刀斬呀。
本月還有Netflix重拍八十年代科幻劇《Lost in Space》(13/4)、萬眾期待HBO《Westworld》 (23/4)，以及Hulu重頭作《The Handmaid’s Tale》(25/4)，兩齣都是第二季回歸，應該鬥到難分難解，追得切上述咁多套，都應該夠皮了。
