港產劇集近年被認定已沒落，不過最近見到歷史悠久嘅華語電視獎《金鐘獎》提名名單，發現可能只係我哋太表面，有幾點值得分享下。
首先，當然係劉俊謙獲提名視帝。要知道《金鐘獎》係一個好有分量嘅電視獎項，劉俊謙由做model開始，跟住喺ViuTV做電視劇開始多人認識，最近大成於電影《九龍城寨》，而家又得到一個衝出香港嘅電視獎提名，其實係好好嘅示範。希望香港多啲演員，有機會可以有咁嘅成長，令世界各地更多人認識。
今屆《金鐘獎》最多提名嘅係一套戲叫《八尺門的辯護人》，總共有16個提名，原來都同香港有關，翻查資料，發現Makerville係投資方/出品方之一。套戲我有睇，係講台灣南部一個有關印尼外勞同原住民嘅殺人兇案，裡面有大量對白係同香港距離好遠嘅印尼話，或者原住民方言，我好好奇點解Makerville 會有份參與呢？成個故仔劇情緊湊，拍攝又認真，咁高質難怪咁多提名。
而我發現另外一套都有獎項提名嘅《非殺人小說》，Makerville都係出品人之一。Makerville為人所熟悉嘅，當然係MIRROR，但亦令佢哋有好多製作同發展都冇被留意。雖知道香港以外唔係個個都識MIRROR，但若公司有能力參與呢一啲好嘅作品，其實都係好事，可以將個生意擴展出去之餘，有一日仲可能成功產生協同效應，帶領藝人有更多途徑去接觸唔同嘅觀眾。
擁有13個提名，僅次《八尺門》嘅《不夠善良的我們》，我見到黃Viu都有買嚟播，聽講都幾多人談論。想像一下如果套劇喺ViuTV或者TVB播會點呢？適唔適合免費電視呢？會唔會有同樣效果？畢竟呢套劇同出軌、不忠有關，免費電視嘅觀眾接唔接受到呢？的確，同一套作品，以不同渠道出現，結果可以好唔同。港產劇以前靠賣埠，但今時今日，以往靠睇港劇嘅市場，都有自己嘅製作，唔少仲好高水平，香港嘅平台應更重視與不同香港以外嘅單位合作，令觀眾視野更廣闊。