《十七年》的兩個難得

ViuTV新劇《十七年命運週期》開播以來口碑唔錯，除咗製作認真，故仔有意思，我覺得套劇仲有以下兩個難得嘅地方值得大家欣賞。

第一，係製作團隊嘅爭氣。《十七年》係導演羅嘉駿第三部電視劇，佢第一部作品《二月廿九》口碑好好，但第二套《940920》成績其實未盡人意，今次擺脫前兩套嘅穿越情節，以香港兩次疫情包裝講一個跨越17年嘅故事，成功引起觀眾共鳴。呢個經歷話俾大家知︰捲土係可以重來。大家有冇留意「首部劇情電影計劃」？多年來帶挈好多新導演令人認識，但大部分都未有第二套成功嘅作品。羅嘉駿經歷起跌，團隊有唔認輸嘅精神重新再嚟過，電視台又肯俾佢再試，呢個精神好難得。其實杜琪峯同許鞍華等好多香港知名導演，都唔係拍一部戲就一鳴驚人，而係電視台出身，喺超密集式拍劇生涯中成長，亦喺成功與失敗之間進步，累積經驗再成為大導演。不過今時今日演藝界產量比以前少，有機會已好難，仲要「失敗」後再有機會磨練，自己又爭氣唔會因為曾經低潮過而鑽咗牛角尖，真係好難得，亦係邁向成為合格導演真正需要嘅歷練。

第二個難得嘅地方，就係呢套劇準確而且大膽地起用新人。兩位新演員小青同蕃茄，第一次做戲已經獲得好多網民認同，我覺得唔只因為導演好眼光，相信仲係團隊用咗大量時間甄選同埋拍攝過程中一直調教。 所以我話佢哋難得夠膽，唔只係用新人、唔計算知名度同商業效果呢種大膽咁簡單，而係要用咁多時間精力去調教新人，但唔知道效果嘅勇敢，願意喺冇保障嘅情況下投放資源同心機，我覺得形容為大膽都唔係最正確，呢種係叫大氣 。

帶出以上兩種難得，係想鼓勵導演團隊同埋ViuTV，繼續走對的路。雖然ViuTV嘅劇集大上大落，但可能就係佢哋呢種仍然相信失敗咗可以再嚟嘅精神，同埋相信即使投資同心機可能會白費，仍然支持新概念同新力量，要有呢種精神，先至會出到一套咁嘅作品 。