傾一年先簽嘅合約
《全民造星V》嘅香胤宅(Lyman)，上年7月拎咗冠軍後，早前確認終於落筆同Makerville簽約，解釋話：「咁我又要睇真啲，佢哋又要睇真啲㗎嘛。」
一份傾咗成年嘅合約，我覺得以下幾點幾有趣：
一) Lyman係美國百老匯音樂劇演員，接觸開當地唔同形式嘅合約，大家都知美國嘅藝人合約，藝人同公司履行責任、工作幾耐、休息幾耐，呢啲都有非常仔細條款，都會鉅細無遺地寫得清清楚楚。我相信呢個都係Lyman要用成年時間「睇真啲」嘅原因，最後決定簽約，我覺得係一個可喜嘅現象，證明咗香港有娛樂公司嘅合約，係經得起相對國際級嘅「檢測」，唔係馬馬虎虎。香港娛樂圈成日俾人形容係大染缸，古靈精怪，呢啲聽起上嚟好似好悶嘅合約條款，先至係將一個行業推向專業嘅必須條件 。
二) 我非常詫異佢哋公司嘅耐性，絕大部分嘅選秀節目都係入圍就要簽約，入決賽甚至贏埋就自動成為長約，但原來《造星》就唔係咁。仲要肯用一年時間，慢慢同藝人去了解同商量，正常公司都會放棄，甚至索性改變玩法，以後強迫所有節目參賽者簽五年約先好參加比賽。呢個咁自由嘅模式，對公司嚟講未必著數，但我覺得對業界就係一件好事，係扭轉咗一般公司比藝人有power嘅局面，讓公司同藝人係真係相對地平等咁合作。
三) 世上充斥住好多網絡評論員，話呢個藝人唔好、嗰個藝人乞人憎，呢件事唔公平之類，其實只係基於自身印象，並唔係對件事有所了解。你可以話呢啲係言論自由，但我會偏向睇重一個體驗過百老匯世界級舞台嘅藝人，用一年時間探索而得出嘅結論，多過條件反射性嘅意見。作為理智嘅觀眾，睇咩評論係會影響自己相信啲乜，如果要參考意見，你又會點揀？
娛樂圈就係一個社會嘅縮影，長此落去，到底我哋分辨一件事嘅能力，又有幾可靠？