古天樂與香港電影及慈善，已成為等義詞。
影帝古天樂最近拍咗套宣傳片，香港相隔廿年，終於喺劉德華之外搵到接班人宣傳好客之道。不過最近有一件事，我覺得係完美演繹「好客之道」，應該成為宣傳人選之一，就係張敬軒先生借出豪宅俾英皇新晉女團VIVA一齊住培養感情。
軒仔經常提攜後輩，更借豪宅給新人女團VIVA，一齊住培養團魂。
張敬軒一直被稱為「樂壇社工」，多年來都聽到好多佢嘅好人好事，而家借出千萬豪宅俾同門師妹同居增進友誼。父母都未必做到，公司同老闆亦都未出手，由一個冇利益關係嘅前輩提出。我睇報道，軒仔仲話俾女團「住到紅為止」，香港寸金尺土，一張「無限期租約」嘅承諾，顯得更加偉大，「樂壇社工」呢個名銜，實在未能夠反映張敬軒嘅好人好事。
大家雖然冇機會入住，但對軒仔呢間位於薄扶林、有百年歷史嘅豪宅應不感陌生，因為張生不時都會借出來俾人拍嘢，大台仲去同佢拍過套特輯，俾大家見識下內部懷舊兼有品味嘅擺設。完美演繹「好客之道」，當然亦都反映軒仔「理財有道」啦！
無獨有偶，「好客大使」古天樂都有間大宅，仲有個玩具倉，不過呢方面古生就冇軒仔咁好客，唔多公開俾人睇，聽講只係會間中帶孤兒院小朋友去參觀。古生一直都低調行善，如果軒仔係「社工」，古生可以話係娛樂圈「社署」。佢經常低調幫助好多娛樂圈嘅前輩，照顧佢哋嘅生活費同醫藥費，仲有人叫佢開埋老人院；出錢出力令香港電影業多啲工開，提攜後輩，令有潛質嘅藝人唔好放棄；內地積極起小學、水井，為偏鄉孩童提供受教育嘅機會等等。
不過以上事跡都係受助者過渡難關後自己講返出來，古生自己好少提及，早排佢拎咗個「世界傑出華人」獎，被記者問到佢行善積德，佢都只係話︰「從來唔回應做慈善嘅嘢，想保持低調，總之有能力就會繼續幫人！」
我諗起有個古生嘅朋友同我講，佢全身每一吋都好黑，除咗個心。今時今日，就係要古生呢啲大愛。