法國名導洛比桑，近年一聽佢個名就知，又係時候提防(伏片)有詐。
洛比桑如何由《這個殺手不太冷》墮落到似笑片多過動作片嘅《救參36小時》系列，睇怕都唔使多講。自《Lucy：超能煞姬》後闊別3年再執導演筒，佢今年帶嚟新作《星際特工：千星之城》。呢部戲嘅原著《星際特工》相當厲害，出自法國漫畫家尚哥迪梅濟耶爾(Jean-Claude Mézières)及皮爾基斯汀(Pierre Christin)之手，1967開始連載，有43年歷史，堪稱當代科幻漫畫神作，據聞佐治盧卡斯都係忠粉，咁洛比桑當然都係，仲話10歲就開始追看。
荷李活三大特技公司首合作
原著漫畫中，主角時空特工Valerian同紅髮女Laureline不斷穿越不同時空，維護28世紀宇宙秩序。而電影版亦以此背景作為開端，講述Valerian(丹德翰飾)及Laureline(卡拉迪樂芬妮飾)被派往阿爾法星(Alpha)執行任務，意外捲入巨大星際陰謀中。呢部戲耗資1.8億歐羅製作，當中有1.3億花喺CG特效，由荷李活當今三大巨頭特效公司包辦，包括《阿凡達》Weta Digital、《星球大戰》Industrial Light & Magic及《權力遊戲》Rodeo FX，全片接近3,000個特效鏡頭。而喺畫師方面，洛比桑今次以概念圖設計比賽，公開招募藝術家及原著fans，選出6位設計師為電影繪圖。
雖然已經燒咗1.8億，但需知道，CG嘅嘢某程度上只係掩眼法，此片喺美國上映，口碑、票房皆仆直，唉，真係戥大導演擔心。